أرشيف شهر: مارس 2011

5مارس

شخابيط

انتِ
عاملالي قلق داخلي
مش هتفهميه ، وأنا مش هعرف أشرحهولك
متعلق بمواضيع كتيير متعرفيهاش ، طيب إيه علاقتها بيكي
علاقتها أنا
كأنك حلم وهصحى منه
كأنك قدر وبهرب منه
إنتِ إيه ، لأ انا إيه ؟

أكون قوي ، أفكر فيكي ألاقيني بنهار
افتكر عينكي أحس بالبرد في وسط النار
أفكار داخلية مليانه أسرار ، نفسي أحكيلك ، لكن
مش عارف أوصل لقرار!
تفكيري فيكي بيغيرني
بيطريقة بتحيرني ، بطريقة عشتها مرة كانت دايماً بتسهرني
احساس جميل في غرابته لما بتحسه أول مرة
معاكي حسيت نفس الإحساس ولأول مرة !!

يعدي الماضي قدام عينيا .. أفكر فيه وافتكرك !
دنا لسه عارفك ، ومع ذلك أنا لسه فاكرك !
ويقولولي فين هيا ، أقول في بالي
طب ومبتقولهاش ليه أقول بقولها بس في خيالي

بحبك ، آه والله
بس في مسافات بيني وبينك
وعشان كده مش هقولك بس مهما كنتي بعيد .. هتفضلي دايما في عيني
يمكن انتِ متعرفيش انك في بالي يمكن تقرأي كلامي تفتكريه كلام من خيالي
قربت منك كتير شفت فيكي بعض التغيير
مش كل حاجة كانت حلوة لكن .. حبيت عيوبك

احساس غريب… انك ممكن تنام ومتصحاش تاني
أو إنك هتفضل عايش طول عمرك وحداني
أو ماشي على طريق وفاضل على نهايتك ثواني
زي إحساس بعدك عني..

عارف انك بالنسبالة لناس تانيين حلم
واني أنا منهم بالنسبالك لقطة في فيلم

©AhmedGhanam, Copyright 2008, All Rights Reserved