أرشيف شهر: يوليو 2010

2يوليو

بعد المحاضرة

بعد المحاضرة..
لمحتها بين المدرجات..
مصدقتش نفسي
ايوة هيا,,

كنت حاسس انها هنا
كالعادة بدأت أفكر في كلامي اللي عايز اقولهولها منذ زمن,
أخدتني ذكرياتي لكام سنة فاتو..
لما كنت بنسي الكلام أول ما بشوفها,
برغم حتي كل الي شفتهم,
برغم كل الي عرفتهم بعدها
برغم كل الي نسيتهم قبلها..

سرحت بخيالي في كل حاجة كنت بحبهعا فيها,,
كل حاجة صحيت فيا تاني,,
فجأة شفت ضحكتهافي خيالي وبصة عينيها

وافتكرت كل البنات اللي دورت كتير فيهم علي حاجة فيها,
سرحت في غرابتها.. قسوتها..تعبي لمجرد إحساسي انها تعبانة.. وحبي لعذابها ليا لمجرد انه منها.

وبرغم ده كنت عارف اني مقدرش اضايقها..
برغم اهانتها ليا..

فكرت في أيام ما سابتني
قبلها بيومين وعدتني
بس انا مسبتهاش تكمل وعدها
قاطعتها
قلتلها اني بثق فيها
ان أنا بحبها

من يومها حاسس انها غلطتي
لما بفضل أوهم نفسي انها كانت هتفرق لو ,,,
لو كنت سبتها تقول اللي في قلبها..

ما بين ذهولي وذكرياتي
ولمجرد رمشة رمشتها
ما بين لحظة غمضت فيها

تاهت في الزحام
لفيت شمال ويمين
طلعت فوق , نزلت تحت
شفت بنات كتير مهياش فيهم
ولقيت في عيونهم كلام

أحلام , أشجان , أوهام

من يومها وانا كل مرة بلمح طيفها من بعيد
أجري عليها واتمني الاقيها أقوللها

اني لسه بحبها

©AhmedGhanam, Copyright 2008, All Rights Reserved